Ғүмерҙәрҙең тағы бер бите тарихта ҡалырға бер генә көн ҡалды.Урта һәм оло йәштәгеләр ҙә,балалар ҙа яңы йылды яңы өмөттәр менән ҡаршы алабыҙ. Иҫке йыл үтер ҙә,яңы йыл яңыса башланыр кеүек,тормош көндәгесә һәүетемсә түгел,ә ниндәйҙер тылсым булыр һымаҡ.Балалар ғына түгел,өлкәндәр ҙә Ҡыш бабайҙың тылсымына ышана шул.Нисек кенә булмаһын,әл дә ошондай матур байрамдар бар әле донъяла.Күңелдәрҙе күтәрерлек йылы һүҙҙәр,йәндәрҙе иретерлек ҡотлауҙарҙы ҡасан ишетер инек әле?Бергәләшеп ултырыуҙар булмаһа бер-береңә күңел йылыңды ҡай ваҡытта өләшер инек әле?
Иҫке йылды ҡәҙерләп кенә оҙатайыҡ.Барыҫ йылы бик уңышлы булды,шөкөр.Тәбиғәт беҙҙе нисек ҡыуандырҙы!Балалар һөйөнөстәре нисек күңелгә яҡын!Аллаһыма мең шөкөр.Ваҡ-төйәк мәшәҡәттәре булды инде,ярай,уларһыҙ ҙа булмай.Ауырыу һау ваҡыттын ҡәҙерен белергә өйрәтә,борсолоуҙар күңел тыныслығының ни тиклем ҡиммәт икәнен онотмаҫлыҡ итә.Улары үткенсе генә булһындар.
Тәбиғәт тә яңы йылды таҙарынып ҡаршыларға булды:ер өҫтө ап-аҡ ҡар менән ҡапланды.Аҡлыҡ-матурлыҡ,тыныслыҡ билгеһе.Еребеҙгә тыныслыҡ килһен,Яңы йылдар һәр кешегә һаулыҡ,бәхет ,уңыштар өләшһен.Балаларҙың шат тауыштары тынмаһын,һәр бала ата-әсәле булып,ҡыуанып йәшәһендәр!
Бөтәгеҙҙе лә Яңы йыл менән!
